பார்த்ததில் பிடித்த காணொளிகள் - 1

முடியைப் பிய்க்கவைக்கும் சூத்திரங்களும், கிரேக்க எழுத்துக்களும்  நிரம்பி எக்ஸாமில் வந்திருந்து வெக்டார் டென்சார் என டென்ஷனை ஏற்றும் அறிவியலை, எளிதாக சுவாரஸ்யமாக சொல்ல முடியுமா? அப்படிச் சொல்வதில் அறிவியல் காணொளிகளுக்கு ஈடு இணை கிடையாது என அடித்துச் சொல்லலாம். அந்தவகையில் இவ்வாரம் பார்த்த வீடியோ தளங்கள், அதில் சுவாரஸ்யமான விடியோக்களின் தொகுப்பு இது.

VERITASIUM (The Element of Truth) 

எம்மைச் சுற்றி நடக்கும் விஷயங்களுக்கு அறிவியல் தரும் சிக்கலான பதில்கள் பாமரருக்கும் புரியும்படி மிகவும் சுவாரஸ்யமான, நூற்று எழுபது சிறுசிறு வீடியோக்களாக உருவாக்கி தனது யூடியூப் சானலில் பகிர்ந்திருக்கிறார் Derek Muller. இதோ அவரது ட்ரைலர்:

ஒளி (light) என்றால் என்ன என்று என்றாவது நாம் யோசித்திருக்கிறோமா? ஒளி வெறும் தண்ணீர் மாதிரித்தான் செயற்படுகிறது என்பதற்கு அசைக்கமுடியாத ஆதாரம் வழங்கிய, இயற்பியலின் பாதையை திசைதிருப்பிய ஒரு பரிசோதனையை (Young's double slit experiment) கடற்கரையில் வெறும் அட்டைப்பெட்டிக்குள் செய்துகாட்டி பொதுமக்களை வாயடைக்க வைக்கிறார். அந்தக் காணொளி கீழே

வாழ்க்கையில் ரிஸ்க் எடுக்க (அது எவ்வளவு லாபகரமாக இருந்தாலும்) நாம் எந்தளவுக்கு தயங்குகிறோம்? சில ரிஸ்குகள் தொடர்ந்து தைரியமாக ஈடுபடும்போது  பெரும் லாபத்தை நிச்சயமாக வழங்குகிறன. முதல் ரிஸ்கையே எடுக்கத் தயங்கினால், தொடர்ந்து எப்படி ரிஸ்க் எடுக்கமுடியும்? Psychology, Strategy Theory, Sociology, Economics போன்ற துறைகளில் ஆராயப்படும் விஷயத்தை ஒரு நாணயத்தை சுண்டிவிட்டு பொதுமக்களிடமே இவர் செய்துகாட்டுகிறார். அந்தக் காணொளி கீழே

ஒரு எளிய, அருமையான சிந்தனை விளையாட்டின்  மூலம் அறிவியல் சிந்தனை எப்படி இயங்குகிறது என்பதை புரியவைக்கிறார். காணொளியைப் பார்ப்பவர்களும் இதை சுவாரஸ்யமாக விளையாடலாம். அந்தக் காணொளி கீழே...

"Does Quantum Entanglement defy Relativity?" என்பதில் ஆரம்பித்து, "Why everything is Random?" என்பதுவரை எக்கச்சக்கமான (171) வீடியோக்களை உருவாக்கியுள்ளார். ஒவ்வொன்றும் அருமையிலும் அருமை. எல்லாவற்றையும் இங்கே பார்க்கலாம்.

TedEd Videos

இவர்களைப்பற்றி உலகத்துக்கே தெரிந்திருந்தாலும் எனக்குத் தெரிந்ததென்னவோ இவ்வாரம்தான். இவர்கள் சிக்கலான அறிவியல் எண்ணக்கருக்களை சுவாரஸ்யமான அனிமேஷன்களாக செய்து தருகிறார்கள்.

மனித உடலிலேயே மிகவும் சிக்கலான உறுப்புக்களில் ஒன்றான கண், எப்படி படிப்படியாக பரிணாம வளர்ச்சியில் உருவாகியது என்பதை இங்கே விளக்குகிறார்கள். ஒளி தன்மேல் விழுவதை உணரக்கூடிய எளிய செல்கள் ஏன், எப்படி குழிவாகி, கண்ணாகி, ஒளிவில்லையுடன் கூடிய தற்போதைய தோற்றத்துக்கு வந்தன என சிறுபிள்ளைக்கும் புரியும் வகையில் விளக்குகிறார்கள். காணொளி கீழே

அப்பாவின் பேச்சை கேட்காமல் இயற்பியல் படிக்கப்போன ஒருவருக்கு படிப்பு முடிந்தும் வேலை கிடைக்கவில்லை. வாழ்க்கையில் தோல்வியடைந்து சாதாரண க்ளார்க் (எழுதுவினைஞர்) வேலையில் சேர்கிறார். திடீரென ஒரே வருடத்தில் (1905) நான்கு ஆராய்ச்சிக் கட்டுரைகளை மளமளவென்று எழுதி வெளியிடுகிறார். அவை சும்மா கட்டுரைகள் அல்ல. இயற்பியலின் அஸ்திவாரத்த்தை நான்கு மூலைகளில் வெடிவைத்துத் தகர்த்த, உலகம் பற்றிய அறிவியலின் புரிதலை நான்கு வெவ்வேறு தளங்களில் புரட்டிப்போட்ட புரட்சிக் கட்டுரைகள். ஒரு சாதாரண மேஜை கிளார்க் ஒரே வருடத்தில் இயற்பியலை புரட்டியது எப்படி? அது சாத்தியமா? அதனால்தான் 1905 ஆம் வருடத்தை Einstein's Miracle Year (Annus Mirabilis) என அழைக்கிறார்கள். (சொல்ல மறந்துவிட்டேன்.. அந்த மேஜை கிளார்க் தான் நம் ஐன்ஸ்டைன்.) :-)

நான்கில் ஒரு கட்டுரை (Brownian Motion) அணுக்களின் இருப்பை சந்தேகமின்றி உறுதிசெய்து Statistical Mechanics இலும் புரட்சி செய்தது. அடுத்த கட்டுரை (Photoelectric Effect) இருநூறு வருடங்களாக நம்பப்பட்ட "ஒளி ஒருவித அலை" என்பதை தகர்த்தெறிந்து 'ஒளி துகள்களாகவும் செயற்படுகிறது' என்றதோடு  பிற்காலத்தில் நோபல் பரிசையும் பெற்று, இன்றும் பல விஞ்ஞானிகளின் மொட்டைத்தலைக்கு காரணமாகும் குவாண்டம் அறிவியலையும் ஒருவகையில் தொடக்கிவைத்தது.  இன்னொரு கட்டுரை (Special Relativity) ஒளியின் வேகத்தை நெருங்கும்போது பல பைத்தியக்காரத்தனமான பௌதீக மாற்றங்கள் நடக்கும் என பயமுறுத்தியது. (அவையெல்லாம் உண்மையிலேயே நடக்கின்றன என பிறகு நிரூபணமானது) கடைசிக் கட்டுரை (Mass-Energy equivalence ) பொருட்கள் எல்லாமே வெறும் சக்தியால் ஆனவை என்றதுடன், சூரியனுக்குள்ளே என்ன நடக்கிறது, அணுகுண்டு உருவாக்குவது எப்படி என்பதற்கெல்லாம் விளக்கம் கொடுத்தது.

அவற்றைப்பற்றிய ஒரு தெளிவான சுவாரஸ்யமான அனிமேஷன் வீடியோ இதோ:

மற்ற காணொளிகள்

ஆப்பிள் எப்படி விழுகிறது? பூமி சூரியனை எப்படி சுற்றுகிறது? சந்திரன், பூமியைச் சுற்றிக்கொண்டே சூரியனை எப்படி சுற்றுகிறது? ஏன் பெரும்பாலான கிரகங்கள் ஒரே திசையில், ஒரே தளத்தில் சூரியனை வலம் வருகின்றன? சந்திரனுக்கு அனுப்பும் விண்கலத்தை எரிபொருள் இல்லாமலேயே பூமிக்கு கொண்டுவருவது எப்படி? இதையெல்லாம் கோலி உருண்டைகளை ரப்பர் ஷீட்டில் உருட்டி உருட்டியே இவர் செய்து காட்டுகிறார். பார்த்து வாயடைப்போம் வாருங்கள். அந்தக் காணொளி கீழே.

அதே ஐன்ஸ்டனின் அடுத்த தியரி (General Theory of Relativity - பொதுச்சார்புக் கொள்கை)  இயற்பியலை மட்டுமன்றி பிரபஞ்சத்தையே புரட்டிப் போட்டது என்றால் அது மிகையில்லை. வெளியும் காலமும் ஒண்ணு, அது தெரியாதவங்க வாயில மண்ணு என்று சொல்லிவிட்டு, நிறையுள்ள பொருட்கள் இந்த காலவெளியை வளைக்கின்றன, ஈர்ப்பு விசை என்பதே இந்த வளைவால் உருவாகும் ஒரு மாயைதான் என்றெல்லாம் தலைவர் சொன்னார். அன்றுமுதல் இன்றுவரை நூறு வருடங்களாக லேபிலிருந்து விண்வெளி வரை எங்கெங்கோ செய்யப்பட்ட ஆயிரக்காணக்கான பரிசோதனைகளில் ஒன்றில்கூட இது தோல்வியடையவில்லை! தெலுங்குப்பட  ஹீரோவைப்போல ஒத்தையாக நின்று இன்றுவரை அடித்து ஆடிக்கொண்டிருக்கும் அந்தக் கொள்கையை, ஒருவர் வெறும் ரப்பர் ஷீட்டை வைத்து விளக்குகிறார்!

அறிவியலை ரசிப்போம்...